Joh 20 | KYG | STEP | Hogote afina'mo kotino alino ha ole'nigeno'ae'mo Maliya'a Maganala kotega a kanomo kanolulega uno ageyana yafa ka avayale'mo ai'ana akani male'na'a yafa'mo avayale'mo ohaneno afayatega hane'nigeno age'niye.

John 20

Yesu'a ago he ti'niya gemae

(Mt 28:1-8; Mk 16:1-8; Lu 24:1-12)

1 Hogote afina'mo kotino alino ha ole'nigeno'ae'mo Maliya'a Maganala kotega a kanomo kanolulega uno ageyana yafa ka avayale'mo ai'ana akani male'na'a yafa'mo avayale'mo ohaneno afayatega hane'nigeno age'niye. 2 Ageteno nagu nagu huno uno Saimoni Pita'e mago ge'amo ne'afiya vekamo Yesu'a hau'niya veka'e'mo mai'na'ategamo uno'ae'mo, apakaemo Ala kava ne'mo agufa'amo yafa kapati'mo alini u'a haiya'ale'mo male'nafi huta o'ageta ataleta e'none, huno hana pai'nige'ana 3 Pita'e alu vekamo ge'amo ne'afiya veka'e'mo kanolulega u'na'ae. 4 Magokepi lokae'ana nagu nagu hu'ana u'anae'mo alu vekamo'a Pita'mo ago aeno agaseno hogoteno uno yafa kate'mo ava'yi huteno 5 ape huno ageyana Yesu'a hayae'ana ate'na'a lavolavo'age'mo hane'nigeno age'niyana faleno ohai'niye. 6 Saimoni Pita'a akame huno eno yafa kapi'mo faleno haino ageyana Yesu'a hayae'ana ate'na'a lavolavo'age'mo hane'nigeno age'niye. Agenopale'mo kino ne'aliya akasipimo magokepi lavolavo'e'mo ohane'nifa lo aeno aote male'nigeno hane'niye. 8 Alu vekamo ge'amo ne'afiya vekamo hogoteno nagu nagu huno uno ava'yi hu'niya vekamo'a yafa kapi'mo uno haino ageteno'ae'mo agesa afino fatago hu'niye. 9 Hu'niya'monanafa ani afina'mo Goti mukufi gemo'a huno'ae'mo, faliteno he tigiye, huno hu male'niya ge'ae'mo anakesa o'afi'na'ae. 10 Inagi ge'amo ne'afi'a vekala'mo ate'ana no'anilegamo u'na'ae.

Maliya'a Yesu'mo age'niya gemae

(Mt 28:9,10; Mk 16:1-8; Lu 24:1-12)

11 U'na'a'monanafa Maliya'a eno yafa ka avayale'mo he tino mai'neno avi'ya nehuno'ae'mo ape huno yafa kapi'mo ageyana 12 lole enisole vekala'mo yaveyave kukena vaili'na'a vekala'mo mai'na'ageno anake'niye. Yesu'mo alini u'ana hai'ana male'na'a yate'mo mago vekamo agenopalega mai'nigeno mago vekamo aiyalegamo mai'niye. 13 Anakaemo, Ane, hu'ana, na kava higekae'mo avi'ya'mo nehane, hu'ana afi ge'na'ageno Ala kava veka'nimo alini u'a haiya'ale'mo male'nafi hu'na o'agove, huno hana paiteno 14 aino afe leno ageyana Yesu'a he tino mai'nigeno age'niyana Yesu'mae, huno o'age'niye. 15 Yesu'a, Ane, huno, na kava higekae'mo avi'ya'mo nehane. Ina lafe'mo kahauya nehane, huno afi ge'nigeno Maliya'a hoyafi'mo ali'ya'mo ne'aliya vekamo mai'niye, huno agesa afiteno'ae'mo, kagaemo haiya kava hane, huno huteno, kahao ke hogi agufa'amo alinika uka male'nisana yategae'mo naha paiyo. U'na alini'na ugesuve, huno afi ge'nigeno 16 Yesu'a, Maliyao, huno hu'nigeno aino afe leno Himulu gefati'mo, Lamonai, ina ge huno, Tisao, huno hu'nigeno'ae'mo, 17 afo'nimotegamo ohai'nova'mofe'mo nanu okika afa'a natalo. Nagana'nimogife'mo uka hapa paikae'mo, koku'napi Afo'nimo Goti'nimotegamo Afotapimo Gotitapimotegamo haiguve, huno hu'niye, huka uka hapa paiyo, huno ha pai'niye. 18 Maliya'a Maganala kotega a'mo'a uno ge'amo ne'afiya vaya'aife'mo, Ala kava ne'mo ago age'nove, huno hapa paiteno Yesu'a ha pai'niya gemo hapa pai'niye.

Yesu'a ge'amo ne'afiya vaya'ai apaulagale'mo afole ai'niya gemae

(Mt 28:16-20; Mk 16:14-18; Lu 24:36-49)

19 Ani afina'mo hogote afina'moge'a hani hu'nige'apae'mo Yesu ge'amo ne'afiya vaya'mogi Yu vaya'aife'mo koli hute'apae'mo nopi'mo loki ae male'a mai'naya'monanafa Yesu'a ali'a anupa hu'a mai'naya folagapi'mo he tino mai'neno'ae'mo, lapaipamo'mo falu hino, huno hapa paiteno'ae'mo 20 aya agusala'mo alino ataleno apave liteno haopamo alino apave li'niye. Agete'apae'mo ge'amo ne'afiya vaya'mogi apamogaga ai'nae. 21 Yesu'a halate, lapaipamo'mo falu hino. Afo'nimo'mo alino nate'nige'na emi'ne'nova kava hu'na ali'na lapatesugetapa ugae, huno hapa paiteno 22 apakaete'mo avamusa'mo aiteno'ae'mo, Aote Auneme'amo aliyo, huno hapa paiteno, 23 Lapakaemo mago vaya'aife'mo, Goti'a hosu kavatapimo alino atale'niye, hutapa hapa paisageno'ae'mo ago alino atale'niyanageno hosu kava'apimo ohanegaiye. Ani ge hutapa mago vaya'aife'mo Goti'a hosu kavatapimo alino o'atale'niye, hutapa hapa paisageno'ae'mo alino o'atale'niyanageno hosu kava'apimo afa'a hanegaiye, huno hapa pai'niye.

Tomasi'a Yesu'mo age'niya gemae

24 Yesu'a afole ai'niya afina'mo Tomasi'mo tuolofu'a vayapati vekae'mo lago'ya mafa'neo hu'a agi ne'aya vekamo ani afina'mo eno apakae'e'mo magokepi lokaeno o'mai'niye. 25 O'mai'niya'mofe'mo ge'amo ne'afiya vaya'mogi Tomasife'mo, Ala kava ne'mo ago age'none, hu'a ha pai'nageno'ae'mo, ayatalapi'mo nili ai'naya ka'mo o'agege ati yagaina nayateti'mo ayatalapi nili ai'naya kapi'mo o'vaige haopafi'mo hayo ae'naya kapi'mo naya'mo o'vaige hisuvana, ago he ti'niye, hu'na nagesa o'afiguve, huno hapa pai'niye. 26 Anaga hogote salefi'mo halate ge'amo ne'afiya vaya'mo nopi'mo Tomasi'e'mo magokepi lokae'a mai'nae. Kitale'mo loki ae male'naya'monanafa Yesu'a ali'a anupa hu'a mai'naya folagapi'mo he tino mai'neno'ae'mo, lapaipamo'mo falu hino, huno hapa paiteno 27 Tomasife'mo, ati yagaina kaya'mo male male'neka nayatalapi'mo ago. Kaya'mo alika atale'neka ati yagaina kayateti'mo nahaopafi'mo hayoleti'mo ae'naya kapi'mo vaiyo. Vaiteka kagesa afika fatago nosana kavakamo ataleka kagesa afika fatago huvo, huno ha pai'nigeno 28 Tomasi'a, Ala kava veka'nimo Goti'nimogae, huno ha pai'nigeno'ae'mo, 29 kagaemo nagana'mofe'mo kagesa afika fatago nehapiye. O'nage'naya'monanafa nagaefe'mo apakesa afi'a fatago hu'naya vaya'mogi'e henaga'amo apakesa afi'a fatago hisaya vaya'mogi'e'mo Goti aulagale'mo alagepa hu'a mai'nayanage'a afa'a apamogaga aigae, huno ha pai'niye.

Apakesa afi'a fatago hisayafe'mo avo'mo nekaove, huno hu'niya gemae

30 Yesu'a ge'amo ne'afiya vaya'ai apaulagale'mo muki no'agaya agufa aune kava'mo mago'e huno hu'niya kavafe'mo mani mukufi'mo avo'mo okae'nove. 31 Lapakesa afita fatago hutetapae'mo, Yesu'a Kalaisi vekamo Goti Mafa'ne'amo mai'niye, hutetapa mai'netapae'mo agi'aleti'mo alagepa hutapa maige maige hutapa maisayafe'mo mani gemo hu'na avo'mo kae male'nove.